Гимназиямыздың тарих бірлестігінің ұстаздары «Оқуға құштар мектеп» жобасы аясында Шыңғыс заманы мен оның тұңғыш ұлы Жошы хан жорықтары туралы жазылған Ұларбек Дәлейұлының «Жошы хан» тарихи романын талдады.

Жошының қым-қиғаш күндерде ғұмыр есігін ашуы, өскен ортасы мен жастық шағы, алғашқы жорық жолы мен өмірінің соңына дейінгі оқиғалар барынша толық баяндалады. Романның құндылығы – сол дәуірге қатысты жазылған ең сенімді дереккөздерді пайдалана отырып, оқиғалар өрісін шынайы фактілермен түйіндеуінде. Таңғұт, шүршіт соғыстары, ғалам тарихында елеулі орны бар Хорезм жорықтары, шайқас орындары сол қалпы көркем тілде хатқа түскен. Жошы хан Хорезм жорығынан қайтып, Шыңғыс қағанның арнайы жарлығымен Дәшті-Қыпшақ даласында «Жошы ұлысын» құрады. Бүгінгі Қазақ Елі сол Жошы ұлысының жерінде Алтын Орданың қарашаңырағын ұстап отыр. Бұл – Жошы хан жайында жазылған тұңғыш роман.